Një nga të shoqëruarit e protestës së disa ditëve më parë, Arbër Lleshi, pretendon se është dhunuar në automjetin e policisë gjatë shoqërimit nga Parlamenti në Komisariat.
Duke folur nga protesta e sotme përballë Kryeministrisë, Lleshi tha se ndërsa ishte i prangosur një person pa uniformë në makinën e policisë e godiste me grushte në fytyrë.
“Dhuna policore e ushtruar mbi bashkëaktivistët dhe bashkëprotestuesit është e paprecedentë. Unë mund t’ju deklaroj personalisht se jam dhunuar brenda automjetit të policisë, gjatë udhëtimit nga Parlamenti deri te Komisariati i Policisë. Me këtë s’dua të viktimizohem, sepse me praninë tuaj ndihem më i fortë se kurrë. Një person me duart e prangosura mbrapa, që goditet në fytyrë, 30 herë, nga një person pa uniformë, i paidentifikuar, në prezencë të dy efektivëve me uniformë, në sediljen e parë të policisë, është torturë”, u shpreh Lleshi.
