Vetëm 14-vjeç e trauma dhe dhimbja e madhe që i ka lënë në shpirt ndarja nga jeta e mikut të tij Martin Cani, është e paharrueshme për Luis Meçjen. Tashmë i rikthyer në skuadrën e zemrës, aty ku dhe nisi gjithçka, që nga njohja me Martinin e gjorë e deri tek pasioni i pashterueshëm për futbollin, Luisi ndan me publikun emocionet e rikthimit në ekip si dhe boshllëkun e madh që ka lënë pas Martini.
Pas një kalvari të gjatë vizitash nëpër spitale sa në vend e deri në Itali, Luisi është rikthyer përsëri në skuadër për tu stërvitur me shokët e tij dhe për të realizuar ëndrrën e madhe që ka për futbollin.
“Me shëndet mirë jam. Ndihem mirë që jam kthyer në stërvitje, kam shumë dëshirë të ingranohem për të gjetur formën që kisha, por ndihem shumë i lodhur, nuk kam oreks, nuk haj dot bukë. Jam shumë i lodhur”, shprehet Luisi për TCH.
Luisi tregon se asgjë në ekip nuk është si më parë. Të gjithë janë të mërzitur e të demoralizuar prej mungesës së mikut të tyre, Martinin.
“Çunat janë të mërzitur, sepse nuk kemi një lojtarë, një vëlla tonin, Martinin. Nuk është si më parë, kemi patur shumë harmoni mes nesh, ishim të gëzuar, por tani sikur ka ndryshuar shumë cdo gjë. Ai ka qenë humori i ekipit”, shtoi më tej adoleshenti.
Kur flet për ëndrrën e madhe për të fituar kampionatin, Luisi tashmë nuk luan më vetëm për veten e tij, por dhe për shokun që nuk jeton më Martinin.
“Dua shumë që të shkoj në formën time që isha, por nga dëmtimet, plaga, është shumë e vështirë, do të bëj të pamundurën. Po, sepse tani unë luaj për dy jo vetëm për veten”, përfundoi ai.
Kujtojmë që rreth dy muaj më parë, 14-vjeçari Martin Cani, humbi jetën pasi u godit me thikë në zemër nga bashkëmoshatari i tij, Mario Përlleshaj në shkollën 9-vjeçare “Fan Noli” në kryeqytet. Në këtë sherr mbeti i plagosur rëndë dhe shoku i Martinit, Luis Meçja, i cili fatmirësisht i bëri ballë plagëve të marra dhe tashmë gëzon shëndet të plotë.
