Ish-deputetja e Partia Socialiste, Marjana Koçeku, ka reaguar pas tensioneve dhe përplasjeve të regjistruara gjatë protestës së zhvilluar para Kuvendit.
Përmes një postimi në Facebook, Koçeku kritikoi ndërhyrjen e policisë ndaj protestuesve, duke e cilësuar dhunën si të vetmin mesazh që pushteti po u jep qytetarëve të pakënaqur.
“Kam ndjekë me shqetësim sot dhunën policore të ushtrueme mbi protestuesit. Më vjen keq që i vetmi komunikim dhe mesazh politik që ky pushtet mundet me u ofru protestuesve asht dhuna”, shkruan ajo.
Në reagimin e saj, ish-deputetja shton se një shtet që përdor forcën ndaj qytetarëve demonstron mungesë argumentesh dhe pafuqinë për të bindur publikun.
“Kur argumentet i mbarojnë nji shteti, mbesin vetëm shkopi i gomës, prangat dhe çizmja e policit. Por asnji pushtet nuk e ka zgjatë jetën e vet tu i goditë qytetarët që kërkojnë me u dëgjue”, vijon Koçeku.
Ajo thekson më tej se historia ka treguar se përdorimi i dhunës ndaj qytetarëve nuk sjell zgjidhje, ndërsa përfundon se “nji shtet që zgjedh me iu përgjigjë pakënaqësisë qytetare me dhunë, nuk po demonstron forcë; po demonstron pafuqinë e vet për me bindë”.
