Tiranë- Kryeministri Edi Rama dhe Ministrja e Shëndetësisë dhe Mirëqënies Sociale, Evis Sala ditën e sotme ishin të pranishëm në inagurimin e Maternitetit “Mbretëresha Geraldinë”, një investim që e ngre kujdesin për nënat dhe foshnjat në standardet më të mira europiane, me ambiente moderne, teknologji të avancuar dhe kushte optimale për stafin mjekësor dhe pacientët.
Ministrja e Shëndetësisë dhe Mirëqenies Sociale, Evis Sala, u shpreh se inaugurimi i Maternitetit “Mbretëresha Geraldinë” përfaqëson një hap të rëndësishëm në përmirësimin e kujdesit për nënat dhe foshnjat. Ajo theksoi se investimet në maternitete po shtrihen në të gjithë vendin, duke garantuar shërbime moderne dhe standarde europiane.
Sala: Gjërat më të mëdha ndërtohen përmes veprave të vogla, me shumë dashuri dhe profesionalizëm. Këtu lind jeta, këtu fillon kujdesi për nënën dhe fëmijën. Ajo që po inagurojmë sot është një ndërtesë e re, por përtej ndërtesës është një kujdes i integruar që japim ndaj nënës dhe fëmijës. Gjatë viteve të fundit kemi modernizuar disa maternitete, në Berat, Korçë, Gjirokastër, Kukës, Sarandë dhe Lezhë. Puna vijon në Fier dhe Shkodër. Ky është angazhimi ynë!
Kryeministri Edi Rama e cilësoi rikonstruksionin e Maternitetit “Mbretëresha Geraldinë” si pjesë të transformimit të sistemit shëndetësor në vend. Ai vlerësoi investimin që ruan trashëgiminë e godinës, ndërsa krijon kushte bashkëkohore për pacientët dhe stafin mjekësor, duke shprehur mirënjohje për punën e mjekëve dhe infermierëve.
Rama: Më vjen mirë që sot jemi në një tjetër finish pas një tjetër maratone ku faktikisht ndërmorrëm një transform të domosdoshëm dhe rrënjësor të kësaj strukture. Sot hapim dyert e një materniteti tërësisht të rilindur duke e pasur edhe kujdesin për çka i takon të kaluarës së një trashëgimie kulturore, por edhe hapësirat e reja të cilat i shtohen këtij materniteti dhe e bëjnë më të lehtë shërbimin, e bëjnë shumë më cilësor edhe qëndrimin e nënave dhe fëmijëve që hyjnë dhe dalin nga ky maternitet. Transformimi i shëndetësisë është në sytë e të gjithë atyre që duan të shohin, por shëndetësia është edhe në gojët e atyre që nuk duan të shohin. I shpreh respektin të gjithë mjekëve, infermierëve dhe të gjithë punonjësve të shëndetësisë të cilët bëjnë një punë të jashtëzakonshme. Nuk kemi shumë nga ato probleme që kishim një dekadë më parë. Në sistemin tonë shëndetësor kryhen afro 100 mijë ndërhyre kirurgjikale. Është një volum i jashtëzakonshëm shërbimi, i cili flet për faktin që mjekët dhe infermierët në Shqipëri i shërbejnë publikut qyetatrëve njerëzve që kanë nevojë për ta me dinjitet.
Në fund Rama bëri me dije se pagat për mjekët dhe punonjësit e sistemit shëndetësor do të vijojnë të rriten.
