Dani Ceballos nuk është më lojtar i Real Madrid. Klubi madrilen ka zyrtarizuar ndarjen me mesfushorin spanjoll, i cili ka hequr dorë nga viti i fundit i kontratës dhe tashmë është i lirë të firmosë me çdo skuadër.
Marrëveshja mes palëve ishte arritur prej disa ditësh dhe i lejon Ceballos të zgjedhë vetë të ardhmen e tij, ndërsa Real Madrid çlirohet nga paga e lojtarit. Betis, klubi që prej kohësh e dëshiron rikthimin e tij, po studion mundësitë ekonomike për ta afruar, por kërkesat financiare të mesfushorit mbeten ende një pikë e rëndësishme.
Ceballos largohet pas nëntë vitesh si pjesë e Real Madrid. Ai u transferua në Bernabéu në verën e vitit 2017 për 16 milionë euro dhe e mbyll aventurën me një koleksion të madh trofesh, mes tyre tre Champions League, dy La Liga, një Copa del Rey, tre Botërorë Klubesh, dy Superkupa të Europës dhe tre Superkupa të Spanjës.
“Real Madrid falënderon Dani Ceballos për përkushtimin dhe punën gjatë kohës së tij në klub dhe i uron atij dhe familjes më të mirat në këtë etapë të re. Real Madrid është dhe do të jetë gjithmonë shtëpia e tij”, thuhet në komunikatën zyrtare të klubit.
Pavarësisht trofeve të shumtë, Ceballos nuk arriti kurrë të bëhej titullar i padiskutueshëm te Real Madrid. Mungesa e minutave e çoi edhe drejt huazimit te Arsenal për dy sezone, ndërsa pas rikthimit në Madrid pati momente pozitive, por pa arritur të konsolidohej plotësisht në formacion.
Në vitet e fundit, lojtari kishte pasur interes nga disa klube jashtë Spanjës, përfshirë Marseille dhe Ajax, por në fund vendosi vetë të mbyllte kapitullin me Real Madrid dhe të kërkojë një projekt të ri.
Pas zyrtarizimit, Ceballos publikoi edhe një letër lamtumire, ku falënderoi klubin, presidentin, trajnerët, shokët e skuadrës dhe tifozët madrilenë.
“Largohem me qetësinë se kam dhënë gjithçka për këtë stemë dhe se i kam mbrojtur këto ngjyra me krenari dhe me gjithë zemër. Real Madrid do të jetë gjithmonë pjesë e imja”, shkroi mesfushori.
