Ministria e Financave i ka kthyer përgjigje Shoqatës Kombëtare të Transportit për zbatimin e detyrimit me pajisjen POS në autobusët e shërbimit publik. Ministria thotë se operatorët e transportit urban nuk kanë detyrim për pagesat me kartë për shkak të pajisjes së menjëhershme me biletë ose abone të pasagjerëve.
“Rezulton se operatorët e transportit publik urban brenda qytetit (autobusët), duke qenë të përjashtuar nga detyrimi për të lëshuar dhe fiskalizuar fatura për furnizimet që kryejnë, nëse bileta ose aboneja u jepet pasagjerëve direkt nga drejtuesi i mjetit ose nga një person autorizuar, rrjedhimisht janë të përjashtuar edhe nga detyrimi ligjor për t’u pajisur me terminal ‘POS/POI’ në çdo pikë shitjeje, në rastin konkret në çdo autobus urban individual, që operon brenda qytetit”, thuhet në përgjigjen e ministrisë.
Kujtojmë që Shoqata kishte paralajmëruar se nëse operatorët e transportit publik do të nisin të përdorin sistemin POS/POI për pagesat, bileta e autobusit për qytetarët nuk do të kushtojë 40 lekë sa është aktualisht çmimi, por 30 lekë më shumë.
