Të paktën 9 persona humbën jetën dhe mbi 40 të tjerë mbetën të plagosur pas një vale sulmesh ruse me raketa dhe dronë ndaj disa qyteteve të Ukrainës. Sulmet goditën kryeqytetin Kiev, si dhe rajonet e Harkivit dhe Dnipros, duke shkaktuar dëme të mëdha në ndërtesa banimi, objekte infrastrukturore dhe institucione publike. Sipas Prokurorisë së Përgjithshme të Ukrainës, mes viktimave ka edhe punonjës të shërbimeve të emergjencës.
Autoritetet ukrainase thanë se Rusia kreu një sulm masiv gjatë natës, ndërsa ekipet e shpëtimit vijuan kërkimet nën rrënoja për të mbijetuar të mundshëm. Presidenti Volodymyr Zelensky dënoi bombardimet dhe bëri thirrje për forcimin e mbrojtjes ajrore të vendit. Sulmet vijnë në një kohë kur lufta ka hyrë në vitin e pestë dhe përpjekjet diplomatike për një armëpushim mbeten pa rezultat.
