Sekretari amerikan i Shtetit, Marco Rubio, deklaroi se Irani nuk do të lejohet të vendosë tarifa për kalimin e anijeve në ngushticën strategjike të Hormuzit, një nga korridoret më të rëndësishme për transportin global të naftës. Në një intervistë për Fox News, Rubio theksoi se mbyllja ose kufizimi i lundrimit në këtë zonë do të përbënte një përshkallëzim të madh dhe do të dëmtonte jo vetëm ekonominë botërore, por edhe vetë Iranin.
Deklarata e shefit të diplomacisë amerikane vjen pasi në Iran janë shtuar thirrjet për mbylljen e ngushticës së Hormuzit, pas tensioneve të fundit me Shtetet e Bashkuara. Rubio nënvizoi se komuniteti ndërkombëtar nuk do të lejojë që Teherani të përdorë këtë rrugë detare si mjet presioni ekonomik, duke shtuar se një veprim i tillë do të sillte pasoja serioze për regjimin iranian dhe do të kërkonte një reagim të koordinuar ndërkombëtar.
