Anglia e nisi Botërorin me një fitore të madhe 4-2 ndaj Kroacisë, por jo të gjithë dolën të kënaqur nga mbrëmja në Dallas. Anthony Gordon, blerja e re e Barcelonës, ishte nota më negative e skuadrës së Thomas Tuchel.
Anësori anglez e nisi ndeshjen si titullar pas paraqitjes së mirë në miqësoren ndaj Kosta Rikës, por nuk arriti ta përsëriste atë nivel në debutimin e Botërorit. Gordon qëndroi në fushë 72 minuta, por pati shumë pak ndikim në lojën e Anglisë.
Lajmi më i keq për të ishte se zëvendësuesi i tij, Marcus Rashford, hyri në fushë dhe bëri menjëherë diferencën. Në vetëm 18 minuta, sulmuesi shënoi golin e katërt të Anglisë, duke vulosur fitoren ndaj Kroacisë dhe duke dhënë sinjale të forta për një vend titullari në ndeshjen e ardhshme.
Sipas Daily Mail, Gordon ishte “anonim në pjesën e parë”, me vetëm 9 prekje të topit. Gazeta britanike theksoi se ai nuk arriti të futej në lojë, humbi dy driblime dhe nuk dukej si anësori për të cilin Barcelona pagoi 70 milionë paund. Për paraqitjen e tij, Gordon mori notën 3, më të ulëtën në ekipin anglez.
Statistikat nuk ishin në favor të tij. Në 72 minuta lojë, ai regjistroi vetëm 17 prekje të topit, asnjë krosim të tentuar, 0 nga 2 driblime të suksesshme dhe 0 nga 2 dyluftime të fituara.
Pas ndeshjes, vetë Gordon foli për BBC Radio 5 Live dhe vlerësoi ndikimin e lojtarëve që hynë nga stoli.
“Ka qenë një periudhë e çmendur dhe kjo ishte qershia mbi tortë. Ndeshja ime e parë në Kupën e Botës, diçka që e kam ëndërruar që kur isha fëmijë. Është speciale, por nuk ka të bëjë me mua. Egoizmi është sëmundje dhe nuk dua të jem pjesë e kësaj. Ka të bëjë me skuadrën. Rashy hyri dhe pati ndikim të madh, ashtu si Bukayo dhe Morgan. Ishte një përpjekje kolektive”, tha Gordon.
Te Barcelona, megjithatë, paraqitja e tij nuk ka kaluar pa u vënë re. Klubi katalanas ka investuar shumë për një lojtar që njihet për energjinë, presingun dhe sakrificën, por në “Camp Nou” presin edhe më shumë vendosmëri në zonën e fundit, driblime dhe gola.
Pikërisht atë që bëri Rashford ndaj Kroacisë, Gordon nuk arriti ta bënte. Për këtë arsye, debutimi i tij në Botëror ka lënë një shije të hidhur te Barcelona dhe tashmë vendi i tij si titullar ndaj Ganës duket në dyshim.
