Ibrahima Konaté është zyrtarisht lojtari më i ri i Real Madrid. Qendërmbrojtësi francez ka firmosur kontratë katërvjeçare me klubin madrilen, deri në vitin 2030, pasi nuk rinovoi me Liverpool.
Konaté mbërrin në “Bernabéu” pa kosto transferimi, një lëvizje që Real Madrid e ka shpërblyer me një pagë të lartë. Sipas raportimeve, mbrojtësi do të përfitojë rreth 22 milionë euro bruto në sezon.
Francezi pritet të prezantohet pas Kupës së Botës dhe do të luftojë për një vend titullari me Militaon, Huijsen dhe Rüdiger. Te Real Madrid, ai shihet si një përforcim i rëndësishëm për repartin defensiv dhe si zëvendësuesi i David Alabas.
Transferimi i tij mbyll një sagë të gjatë. Konaté ishte prej muajsh në radarët e Real Madrid, ndërsa Liverpool u përpoq deri në fund ta bindte për rinovim. Madje, në një moment marrëveshja dukej pranë, por kërkesat financiare nuk u plotësuan dhe lojtari vendosi të priste ofertën e madrilenëve.
Bayern Munich dhe Chelsea gjithashtu shfaqën interes, por Konaté zgjodhi Real Madrid, klubin që e kishte si prioritet. Pas fitores së Florentino Pérez në zgjedhjet presidenciale, marrëveshja u finalizua menjëherë.
Konaté është 27 vjeç, 1.94 metra i gjatë, këmbëdjathtë dhe njihet për forcën fizike, shpejtësinë dhe lojën ajrore. Stili i tij krahasohet shpesh me atë të Rüdiger: agresiv, i fortë në duele dhe shumë i vështirë për t’u kaluar.
Megjithatë, ardhja e tij nuk e mbyll merkaton e Real Madrid në mbrojtje. Klubi po punon ende për një tjetër qendërmbrojtës, këtë herë një lojtar që mund të luajë në krahun e majtë të mbrojtjes. Në listë janë emra si Rúben Dias, Bastoni dhe Schlotterbeck.
I lindur në Paris, me prindër nga Mali, Konaté ka kaluar një rrugë të gjatë deri në “Bernabéu”. Ai u rrit në një familje të madhe, nisi futbollin në rrugët e Parisit, kaloi nga Paris FC, Sochaux dhe RB Leipzig, përpara se të bëhej një nga mbrojtësit më të rëndësishëm të Liverpool.
Tani nis një kapitull i ri. “Ibou”, siç njihet nga shokët e skuadrës, mbërrin te Real Madrid si një nga përforcimet më të rëndësishme të verës dhe me synimin për të fituar menjëherë vendin në formacion.
