Tre persona kanë humbur jetën në një aksident të rëndë detar që ndodhi në zonën mes ishujve Braç dhe Sholta, në Dalmacinë qendrore të Kroacisë. Sipas mediave kroate, në përplasjen e ndodhur në një nga korridoret më të frekuentuara të lundrimit në Adriatik janë përfshirë një katamaran dhe një varkë me vela.
Ngjarja ka shkaktuar një reagim të menjëhershëm të shërbimeve të emergjencës, policisë detare dhe autoriteteve portuale, të cilat kanë mbërritur në vendin e aksidentit pak minuta pas sinjalizimit.
Përveç viktimave, raportohet edhe për persona të plagosur, të cilët janë transportuar me urgjencë drejt spitaleve më të afërta për trajtim mjekësor.
Autoritetet kroate kanë nisur një hetim për të zbardhur rrethanat e sakta të përplasjes, e cila dyshohet se ka ndodhur në një zonë me trafik të lartë detar. Dëshmitarët po merren në pyetje, ndërsa ekspertët po analizojnë kushtet e lundrimit në momentin e aksidentit. Detaje të tjera pritet të publikohen pas përfundimit të hetimeve zyrtare nga autoritetet vendase.
