Botërori 2026 ka nisur me kritika për formatin e ri me 48 kombëtare, një zgjerim që sipas shumë vëzhguesve nuk po sjell domosdoshmërisht më shumë spektakël.
FIFA e ka kthyer turneun në një kompeticion gjigant, me 104 ndeshje, tre vende organizatore dhe më shumë skuadra se kurrë më parë. Por në fushë, sinjalet e para nuk kanë qenë shumë bindëse. Disa ndeshje kanë treguar diferenca të mëdha mes kombëtareve, ndërsa ritmi dhe cilësia e lojës nuk kanë qenë gjithmonë në nivelin e pritshëm.
Një tjetër problem është edhe orari i ndeshjeve. Luajtja në mesditë, nën temperatura të larta, ka ndikuar te lojtarët dhe ka bërë që shumë sfida të humbasin intensitetin shumë shpejt. Kujtimi i Botërorit 1994 në SHBA, ku finalja u luajt në kushte të vështira dhe mbeti një nga më pak spektakolaret, duket se nuk ka shërbyer si mësim.
Kritika ka edhe për pushimet e hidratimit, të cilat po e copëzojnë më shumë lojën. Në një futboll që tashmë ndërpritet shpesh nga simulimet, dëmtimet dhe humbja e kohës, ndalesat shtesë rrezikojnë ta bëjnë ndeshjen më të ngadaltë dhe më pak tërheqëse për tifozët.
Zgjerimi i Botërorit është menduar për të përfshirë më shumë vende dhe për të rritur interesin global, por deri tani pyetja mbetet e hapur: a po e bën FIFA turneun më të madh, apo thjesht më të lodhshëm?
