Gjermania fitoi thellë ndaj Curaçaos, por momenti më i veçantë i ndeshjes i takoi Livano Comenencias.
Futbollisti 22-vjeçar shënoi golin e parë në historinë e Curaçaos në Kupën e Botës, duke i dhuruar një moment krenarie një vendi me vetëm rreth 150 mijë banorë.
Gjermanët e nisën shumë shpejt ndeshjen me golin e Nmechas në minutën e gjashtë, por Curaçao nuk u dorëzua. Në minutën e 20-të, pas një aksioni të rrëmujshëm në zonë, Comenencia goditi fort me të majtën. Topi u devijua nga një mbrojtës gjerman dhe surprizoi Manuel Neuer, duke sjellë barazimin e përkohshëm.
Për Comenencian, i lindur në Breda në vitin 2004 dhe i formuar mes Juventus Next Gen dhe PSV, ky ishte momenti më i madh i karrierës. Aktualisht pjesë e Zurich në kampionatin zviceran, ai tashmë ka shkruar emrin në historinë e futbollit të Curaçaos.
Gjermania reagoi shpejt dhe vendosi më pas superioritetin e saj, por pavarësisht humbjes së rëndë, tifozët dhe lojtarët e Curaçaos do ta mbajnë mend gjatë këtë ndeshje.
Goli i Comenencias nuk ndryshoi fatin e takimit, por i dha Curaçaos një kujtim historik në debutimin e saj në Botëror.
