Marc Cucurella është gjithnjë e më pranë transferimit te Real Madrid. Sipas raportimeve, marrëveshja mes palëve është thuajse e mbyllur verbalisht, ndërsa mungon vetëm firma për ta bërë gjithçka zyrtare.
Mbrojtësi spanjoll dëshiron të largohet nga Chelsea gjatë kësaj vere dhe prioriteti i tij ka qenë rikthimi në Spanjë. Barcelona dhe Atletico Madrid kishin shfaqur interes për të, por hyrja e Real Madrid në garë ka ndryshuar plotësisht situatën.
José Mourinho ka luajtur një rol vendimtar në këtë operacion. Trajneri e ka kërkuar personalisht Cucurellan dhe dëshiron ta ketë së bashku me Carreras si alternativat kryesore në krahun e majtë të mbrojtjes.
Transferimi pritet të kushtojë rreth 50 milionë euro, ndërsa lojtari do të firmoste një kontratë katërvjeçare me klubin madrilen. Kjo lëvizje vendos në dyshim të ardhmen e Ferland Mendy dhe Fran García, për të cilët Real Madrid mund të dëgjojë oferta gjatë merkatos.
Cucurella, i formuar në akademinë e Barcelonës, ka luajtur më pas për Eibar, Getafe, Brighton dhe Chelsea. Tani, rikthimi i tij në Spanjë duket më afër se kurrë, por këtë herë me fanellën e Real Madrid.
