Gjatë një interviste që dha mbrëmjen e djeshme në emisionin Opinion të gazetarit Blendi Fevziu, ish-ministri i Brendshëm Fatmir Xhafaj, ka folur rreth hetimeve të dosjes ‘Babalja’ ku i përfolur është dhe vëllai i tij.
Në një pjesë të intervistës Xhafaj foli edhe për arsyet e largimit nga posti i tij si Ministër i Brendshëm. Ai u shpreh se e ka dhënë vetë dorëheqjen dhe nuk është shkarkuar. Sipas tij, kryeministri Edi Rama është vënë në dijeni të këtij vendimi me anë të një shkrese.
Xhafaj tha se edhe partnerët strategjikë i kanë kërkuar që të mos e japë dorëheqjen.
Pjesë nga intervista:
Blendi Fevziu: Pse ju largoi Rama nga ministër i Brendshëm?
Fatmir Xhafaj: Nuk më ka larguar Rama, kam ikur unë.
Blendi Fevziu: Pse?
Fatmir Xhafaj: Kam dhënë dorëheqje me shkrim. Edi Rama e ka marrë vesh që unë po iki nga ministër kur i ka shkuar dorëheqja me shkrim. Jo vetëm Edi Rama, por edhe partneret e kanë marrë vesh kur e kanë parë në media. Megjithëse kishin ardhur në zyrën time partnerët strategjik të këtij vendi dhe më kishin kërkuar që asnjë mënyrë nuk duhet të ikja e të lija detyrën për këtë gjë sepse ishin të bindur në pafajësinë time dhe në drejtësinë e asaj që po bëja.
Blendi Fevziu: Po pse e dhatë dorëheqjen se këtë se di?
Fatmir Xhafaj: Që unë kam dhënë dorëheqjen e kanë ditur vetëm familja ime dhe tekstin e dorëheqjes e ka korrigjuar vajza ime e madhe që është kritikja ime më e madhe për çdo gjë që bëj.
Fatmir Xhafaj: Dorëheqjen e kam dhënë për disa arsye sepse e gjithë kjo gjë u bë e padurueshme në një moment dhe po vinte në dyshim integritetin tim. Mbi Policinë u ushtrua një trysni e madhe. Natyrisht çfarëdo të ndodhte duke qenë unë ministër i Brendshëm asnjë nuk do ta besonte dhe mua më interesonte më shumë e vërteta e familjes sime sesa karrigia ime. Nëse unë do të isha ministër i Brendshëm, të gjithë do të thoshin që nëse do jepej ky vendim që u dha të gjithë, do të thoshin që e ka futur në burg ministri i Brendshëm. Kjo ishte një arsye. Natyrisht mund të kishte edhe arsye të tjera dhe kanë qenë një tërrësi faktorësh. Vendosa një ditë të bukur dhe u largova.
