Filipine – Një tërmet i fuqishëm me magnitudë 7.8 ballë goditi të hënën zonën detare në jug të ishullit Mindanao në Filipine, duke shkaktuar të paktën 15 viktima dhe 129 të plagosur, ndërsa disa ndërtesa dhe banesa u shembën.
Sipas Drejtorisë së Mbrojtjes Civile të Filipineve, 12 nga viktimat u regjistruan në rajonin Soccsksargen, i cili përfshin provincat Kotabato, Sultan Kudarat, Sarangani dhe qytetin General Santos. Autoritetet raportuan gjithashtu për dhjetëra të lënduar dhe dëme të konsiderueshme materiale.
Zyrtarë lokalë thanë se disa ndërtesa u shembën plotësisht, ndërsa shumë shtëpi pësuan dëmtime të rënda. “Një numër ndërtesash janë shembur dhe disa banesa janë kthyer në rrënoja”, deklaroi një përfaqësues i policisë në General Santos.
Fillimisht, magnituda e tërmetit u vlerësua në 8.1 ballë, por më pas United States Geological Survey konfirmoi se tërmeti kishte magnitudë 7.8 ballë dhe ndodhi në një thellësi prej rreth 35 kilometrash.
Lëkundja e fortë u ndje në një zonë të gjerë, duke shkaktuar panik te banorët që ndodheshin në ndërtesa dhe në hapësira publike. Tërmeti u regjistrua në orën 07:37 sipas kohës lokale.
Pas goditjes, autoritetet lëshuan paralajmërim për cunami. Pacific Tsunami Warning Center njoftoi se valë me lartësi nga 1 deri në 3 metra mund të godasin brigjet e Filipineve, ndërsa valë nga 0.3 deri në 1 metër mund të prekin Indonezinë dhe Malajzinë.
Ndërkohë, Japan Meteorological Agency lëshoi paralajmërim për cunami përgjatë brigjeve të Japonisë, nga ishulli Okinawa deri në zonat lindore pranë Tokios.
Autoritetet vazhdojnë vlerësimin e dëmeve në zonat më të afërta me epiqendrën, ndërsa ekipet e emergjencës janë angazhuar në operacionet e kërkim-shpëtimit. Filipinet ndodhen në të ashtuquajturin “Unaza e Zjarrit” e Paqësorit, një nga rajonet më aktive sizmike në botë, ku tërmetet e fuqishme janë të shpeshta.
