Andoni Iraola pritet të zyrtarizohet si trajneri i ri i Liverpool, pas largimit të Arne Slot nga stoli i “The Reds”.
Klubi nga “Anfield” ka lëvizur shpejt për të gjetur pasuesin e holandezit dhe ka arritur marrëveshje verbale me trajnerin spanjoll, i cili vjen pas një sezoni shumë pozitiv me Bournemouth.
Iraola e udhëhoqi Bournemouth në vendin e gjashtë në Premier League, duke siguruar futboll evropian për herë të parë në historinë e klubit. Pikërisht stili i tij agresiv, me presing të lartë dhe futboll sulmues, shihet si një nga arsyet pse Liverpool e konsideron profilin e duhur.
Ish-mesfushori i Liverpool, Danny Murphy, beson se ardhja e Iraola do t’u rikthejë tifozëve shpresën dhe entuziazmin para sezonit të ri.
“Jam mjaft i emocionuar. Duke parë mënyrën si luante Bournemouth, nuk ka arsye të mendosh se ai nuk do të përpiqet të luajë njësoj edhe te Liverpool: me guxim, presing të lartë, energji dhe futboll sulmues”, u shpreh Murphy.
Megjithatë, ai pranoi se ka edhe disa dyshime, sidomos për faktin se Iraola nuk ka drejtuar më parë një klub të përmasave të Liverpool dhe nuk ka eksperiencë të madhe në Evropë.
Sipas Murphy, merkatoja e verës do të jetë vendimtare për trajnerin spanjoll, pasi skuadra aktuale ka nevojë për më shumë energji, dinamizëm dhe lojtarë të përshtatshëm për futbollin me intensitet të lartë.
Pavarësisht rezervave, opinioni rreth ardhjes së Iraola në Liverpool duket pozitiv. Shumë tifozë e shohin atë si një mundësi për të rikthyer stilin agresiv dhe emocionues që klubi kishte nën drejtimin e Jurgen Klopp.
