Policia ka arrestuar dy rojet private të kompanisë së sigurisë “Major Security” që në bashkëpunim me Gerald Bibën, tërhoqën zvarrë protestuesin në Zvërnec.
Artur Grami, 35 vjeç dhe Gazmend Vathi, 42 vjeç, tashmë të arrestuar, rezulton se nuk janë të licencuar nga asnjë subjekt për shërbimin privat të sigurisë fizike. Biba, bashkë me ta, e tërhoqën zvarrë protestuesin pasi e kishin goditur me grushte, dhe e mbajtën me forcë brenda kabinës së rojës.
Protestuesi ndenji aty deri në momentin e ndërhyrjes së policisë. Gjatë protestës, u vu re se punonjësit e “Major Security” përdornin maska të zeza dhe spray me piper ndaj tubuesve.
Biba rezultoi më pas se ishte pronari në hije i kompanisë “Major Security”, të cilën e kishte regjistruar në emër të vjehrrës, Shpresa Myzyri. Kompanive “Major Security” dhe “Myrto Security” u është hequr licenca e ushtrimit të aktivitetit.
