Inter po përgatitet për një investim të rëndësishëm në merkato, me Palestra që shihet si një nga objektivat kryesorë për krahun e djathtë.
Sipas raportimeve nga Italia, zikaltërit janë gati të shkojnë mbi shifrën e 40 milionë eurove për lojtarin e Atalanta. Klubi nga Bergamo ka refuzuar tashmë një ofertë prej 40 milionë eurosh plus 5 milionë bonuse, duke bërë të qartë se kërkon rreth 50 milionë euro për ta lënë të largohet.
Nëse operacioni realizohet, Palestra do të bëhej vetëm lojtari i katërt në 10 vitet e fundit për të cilin Inter shpenzon më shumë se 40 milionë euro. Më parë, këtë kufi e kishin kaluar vetëm Romelu Lukaku, Achraf Hakimi dhe Joao Mario.
Lukaku mbetet afrimi më i shtrenjtë i zikaltërve në këtë periudhë, pasi u transferua nga Manchester United për 65 milionë euro plus bonuse. Hakimi mbërriti nga Real Madrid për rreth 45 milionë euro, ndërsa Joao Mario u ble nga Sporting për afërsisht 43 milionë euro.
Drejtuesit Marotta dhe Ausilio e dinë se marrëveshja për Palestra nuk do të jetë e lehtë, por mesazhi nga Atalanta është i qartë: për ta marrë lojtarin nga Zingonia duhet një ofertë shumë e lartë.
Inter e sheh këtë transferim si një investim të madh për të ardhmen, ndërsa merkatoja e verës pritet të tregojë nëse zikaltërit do të jenë gati të afrohen me kërkesën prej 50 milionë eurosh.
