Ministri i Drejtësisë, Toni Gogu gjatë prezantimit të rekomandimeve për vitin 2026, drejtuar prokurorëve dhe drejtuesve të Prokurorisë së Posaçme (SPAK)0 theksoi se kriminaliteti modern ka ndryshuar ndjeshëm dhe kërkon qasje të re institucionale, duke vënë theksin te krimi kibernetik dhe rreziqet që vijnë nga teknologjia.
Sipas tij, pastrimi i parave kryhet gjithnjë e më shpesh përmes kriptovalutave, mashtrimet organizohen online dhe infrastruktura publike është objekt i sulmeve dixhitale.
“Krimi kibernetike dhe format e reja të kriminalitetit… pastrimi i parave bëhet në kripto valuta, mashtrimi organizohet online, infrastrukturat publike sulmohen dixhitalisht… ndaj kërkojmë ngritjen e njësive të specializuara, investime teknologjike dhe trajnime të vazhdueshme,” u shpreh Gogu.
Ai shtoi se edhe kriminaliteti rrugor mbetet një prioritet për shkak të ndikimit të drejtpërdrejtë në sigurinë publike, ndërsa theksoi rëndësinë e bashkëpunimit institucional dhe forcimit të hetimeve financiare dhe konfiskimeve të pasurive.
Nga ana tjetër, drejtuesi i SPAK, Klodian Braho, u ndal te kompleksiteti në rritje i çështjeve që trajton institucioni, duke theksuar se krimi i organizuar dhe korrupsioni kërkojnë qasje më të specializuar dhe teknike.
Sipas tij, lufta kundër këtyre fenomeneve nuk duhet të fokusohet vetëm te individët, por te strukturat dhe rrjetet financiare që i mbështesin ato.
“SPAK është përballur me ngarkesë pune më të madhe, me çështje më komplekse, me pritshmëri më të larta publike dhe forma kriminaliteti që ndryshojnë shpejt. Korrupsioni i nivelit të lartë, krimi i organizuar, pastrimi i parave, kriptovalutat, komunikimet e enkriptuara kërkojnë përgjigje institucionale më të specializuar, më teknike dhe më të qëndrueshme. Lufta kundër korrupsionit dhe krimit të organizuar nuk mund të kufizohet vetëm tek ndjekja e autorëve individuale, por duhet të synojë strukturat, mekanizmat e përfitimit, rrjetet mbështetëse.Për këtë arsye hetimi financiar dhe pasuror do të jetë pjesë thelbësore e punës tonë. SPAK do forcojë qasjen pro aktive në hetim“, tha Braho.
Ai theksoi se hetimi financiar dhe pasuror do të jetë pjesë thelbësore e punës së SPAK, ndërsa kërkoi forcimin e qasjes proaktive në hetim, duke përdorur inteligjencë kriminale, analiza financiare dhe bashkëpunim ndërkombëtar.
“Krimi i organizuar nuk pret të referohet, ai duhet identifikuar, analizuar dhe goditur përmes inteligjencës kriminale, analizës financiare, bashkëpunimit ndërkombëtare dhe përdorimit të mjeteve moderne. Kjo kërkon prokurorë të specializuar, hetues të përgatitur, analistë financiar dhe ekspertë.
Është e rëndësishme që sfidat e reja të shoqërohen me mbështetje të reja buxhetore, Kjo mbështetje nuk duhet parë si privilegj institucional, por si investim në aftësitë e institucioneve të drejtësisë për të luftuar korrupsionin, krimin e organizuar dhe pastrimin e parave në mënyrë sa më efektive”, tha kreu i SPAK.
Të dyja palët u ndalën edhe te nevoja për mbështetje më të fortë buxhetore dhe teknike, duke e konsideruar atë si një investim të domosdoshëm për forcimin e sistemit të drejtësisë dhe luftën kundër korrupsionit dhe krimit të organizuar në vend.
