Kryeministri i vendit, Edi Rama ka folur lidhur me projektin e planifikuar në Zvërnec, duke sqaruar debatet dhe reagimet publike që kanë shoqëruar çështjen ditët e fundit.
Gjatë mbledhjes së Grupit Parlamentar të Partisë Socialiste, Rama tha se projekti ka nisur si interesim i investitorëve që në vitin 2023 dhe se procesi është zhvilluar në bashkëpunim me institucionet përkatëse. Ai u shpreh se qeveria është e hapur për bashkëpunim me investitorët, duke theksuar se shteti shqiptar mbetet palë në projekt dhe jo shitës i pronës.
Rama theksoi se institucionet kanë mbrojtur, interesin publik gjatë gjithë procesit. Ai u ndal edhe te debatet mbi projektin, duke thënë se disa prej imazheve dhe pretendimeve të qarkulluara nuk përputhen me projektin aktual.
Rama: Kur unë kam hyrë në atë zyrë kam thënë që zyra është e imja, pushteti është i juaji. Nuk kam premtuar që nuk do të bëj gabime, por kam premtuar një gjë: që nuk do t’ju tradhtoj kurrë.
Këtu është vendi për t’ju treguar se si ju kanë manipuluar, se si ju kanë tërhequr duke shfrytëzuar atdhetarinë, si ju kanë kthyer në pjesë të një kurthi që i ngrihet kësaj partie dhe mua personalisht prej ditës së parë, por që këtu, në këtë rast, është një kurth për të ardhmen e Shqipërisë. Unë kështu e shoh.
Projekti ka nisur si interesim nga ana e investitorëve në vitin 2023, pra tre vjet më parë. Ka nisur si një interesim bashkë me Sazanin. Qëndrimi ynë që në ditën e parë ka qenë: Sazani është tokë publike. Ka qenë një dëshirë dhe një ambicie e kahershme edhe e qeverive të tjera dhe kryeministrave të tjerë për ta kthyer në një destinacion turistik.
Ne jemi të gatshëm të punojmë me ju dhe kini parasysh që ajo tokë nuk shitet dhe ne duam që shteti shqiptar të jetë palë, ortak. Qeveria e kryeministrit tuaj, që e keni votuar dhe që sot, duke iu bashkuar zemëratës, e konsideroni shitës dhe të korruptuar.
Për projektin e Zvërnecit duhet të shikoni pronat dhe pronarët, pasi ne nuk kemi tokë-shtet aty. Copëza që mund të jenë shtet janë krejtësisht të papërfillshme për ambicien tuaj, kështu që merruni me pronarët.
Ju e dini shumë mirë kush janë njerëzit e interesuar, se e di gjithë bota. Investitorët kanë angazhuar ekselencën botërore në arkitekturë, inxhinieri, mjedis dhe në aspektin juridik.
Administrata shqiptare ka mbrojtur interesat tuaj, interesin e vendit. Kemi bërë detyrën profesionalisht dhe patriotikisht.
Kam parë imazhe të projektit, kam parë pallate. Ku i keni gjetur? Ato nuk kanë lidhje me projektin. Projekti i vjetër është rrëzuar dhe është rrëzuar nga administrata shqiptare.
U është thënë: “Ndjesë, ne kemi kërkesa të larta dhe standarde të larta.” Jo se ishte keq, por ne donim më shumë, jo për vete, por për ju.
Toka është e regjistruar në hipotekë prej shumë vitesh. Negociatat me pronarët janë një çështje mes palëve, ku ne nuk kemi hyrë dhe s’kemi asnjë interes të hyjmë.
Ne jemi të fokusuar te Sazani, për të cilin ende nuk kanë përfunduar negociatat. Rrethimi i pronës është bërë në bazë të lejes së zhvillimit. Rrethimi i pronës është një e drejtë e çdo pronari kur merr lejen e zhvillimit.
