Një 17-vjeçar shqiptar ka ndërruar jetë pas një beteje tetëmujore për jetën, si pasojë e plagëve të marra në një aksident të rëndë me motor në ishullin e Rodosit, në Greqi.
I riu kishte pësuar dëmtime të rënda në kokë gjatë një përplasjeje mes dy motoçikletave, aksident që ndodhi më 29 tetor 2025 pranë një institucioni universitar në Rodos.
Menjëherë pas ngjarjes, ai u transportua me urgjencë në spital nga ekipet e emergjencës, ndërsa gjendja e tij u vlerësua kritike.
Sipas mediave greke, adoleshenti qëndroi për rreth gjashtë muaj i shtruar në spital, ku mjekët bënë përpjekje të vazhdueshme për t’i shpëtuar jetën. Më pas, ai u transferua në një qendër rehabilitimi në Larisa, ku vijoi trajtimin edhe për dy muaj të tjerë.
Pavarësisht kujdesit të pandërprerë mjekësor dhe shpresës së familjarëve për rikuperimin e tij, 17-vjeçari nuk arriti t’u mbijetonte plagëve të marra në aksident dhe ndërroi jetë.
Pas vdekjes së tij, trupi është transportuar në Shqipëri nga i ati, ku do të zhvillohen ceremonitë mortore.
