Luis Enrique ka folur para finales së Champions League ndaj Arsenal, që do të luhet në “Puskas Arena” të Budapestit. Trajneri spanjoll i PSG vlerësoi londinezët, por u shpreh i bindur se skuadra e tij ka forcën për të luftuar deri në fund për trofeun.
Sipas tij, besimi te PSG vjen nga fakti që parizienët janë kampionët në fuqi dhe kanë kaluar një sezon me ngarkesë shumë të madhe.
“Asnjë skuadër në Evropë nuk ka pasur një kalendar më të vështirë se ne në dy vitet e fundit. Kjo na ka ekspozuar dhe na ka bërë të humbasim disa ndeshje. Shpresoj që nesër të jetë një festë e madhe futbolli dhe titulli të shkojë te skuadra që paraqitet më mirë në fushë”, tha Luis Enrique.
Trajneri konfirmoi se Hakimi dhe Nuno Mendes janë në gjendje të mirë dhe do të jenë të gatshëm për finalen. Ai theksoi gjithashtu se nuk ka motivim më të madh se të luash një finale të Champions League.
Luis Enrique nuk pranoi të flasë për favoritë, duke thënë se në një finale gjithçka vendoset nga detajet e vogla dhe aftësia për të menaxhuar presionin.
“Arsenal ka qenë për mua skuadra më e dalluar në Premier League këtë sezon dhe ka bërë mjaftueshëm për ta merituar titullin kampion”, u shpreh ai.
Trajneri i PSG shtoi se finalja do të jetë përballje mes dy skuadrave me ide të ngjashme, edhe pse me mënyra të ndryshme loje. Sipas tij, Arsenal dallohet për fuqinë në sulm, ndërsa PSG për qëndrueshmërinë në mbrojtje.
