E ardhmja e Luka Modric duket gjithnjë e më larg fushës së lojës. Pas dështimit të Milanit për t’u kualifikuar në Champions League, mesfushori kroat mund të zgjedhë t’i japë fund karrierës pas Kupës së Botës me Kroacinë.
Në sezonin e tij me kuqezinjtë, ai zhvilloi 35 ndeshje, shumicën si titullar, duke shënuar dy gola dhe duke dhënë tre asistime. Me paraqitjet e tij, kroati ndihmoi Milanin të qëndronte në garë për Champions deri në javën e fundit të Serie A.
Megjithatë, dëmtimi në fytyrë i pësuar ndaj Juventus ndikoi jo pak në fundin e sezonit të Milanit, që në fund mbeti jashtë elitës evropiane dhe do të luajë në Europa League.
Në vetëm një sezon, Modric arriti të fitojë respektin dhe dashurinë e tifozëve të Milanit, ashtu siç bëri për 13 vite te Real Madrid. Përkushtimi i tij në fushë mbeti i njëjtë, pavarësisht moshës dhe eksperiencës së jashtëzakonshme.
Por në prag të 41-vjetorit, të cilin e mbush më 9 shtator, Modric duket më pranë lamtumirës sesa vazhdimit të karrierës. Pas një rruge të jashtëzakonshme, kroati nuk ka më asgjë për të provuar.
Florentino Pérez ia ka bërë të qartë që dyert e Real Madrid janë gjithmonë të hapura për të. Presidenti madrilen i kishte premtuar Modric se mund të rikthehet në klub në çfarëdo roli që dëshiron, sapo të vendosë të varë këpucët në gozhdë.
Modric është një figurë shumë e respektuar në botën e futbollit dhe një rikthim i tij në strukturën sportive të Real Madrid do të pritej me entuziazëm nga tifozët. Ai mund të ketë rol si drejtor sportiv, këshilltar apo pjesë e klubit në një tjetër format.
Tani vendimi i madh i takon vetë Luka Modric.
