Gjatë fjalës së tij në 35-vjetorin e Partisë Socialiste në Durrës, kryeministri Edi Rama vijoi me gjuhën ironike ndaj opozitës, duke deklaruar se “ka qejf kur shkojnë vetë te grepi dhe tunden në grep”.
Duke injoruar problemet që rëndojnë qytetarët, Rama zgjodhi sërish talljen politike dhe propagandën me shifra ekonomike.
Rama u mburr me shifra mbi rritjen e prodhimit kombëtar dhe pagat mesatare, megjithëse se realiteti i shumë familjeve shqiptare mbetet i vështirë, me inflacionin që ka prekur fuqinë blerëse dhe emigracionin që vijon të zbrazë vendin nga të rinjtë.
“Çfarë nuk thanë për këtë që nesër bëhet një tjetër fakt. Ku nuk shkuan dhe çfarë nuk sajuan. Dhe mbi të gjitha për turpin e madh, por turpi është një fjalë që nuk ka lidhje me ta. Morën rrugën me molotovë dhe gëzoheshin që kazanët e plehrave që digjeshin, apo flakadanët që godisnin Kryeministrinë dhe Xhaminë e Madhe dilnin në mediat e botës.
Arritën deri në pikën që nxorën flamujt e Gjermanisë në bulevard. Kishim parë flamujt e Amerikës, kur thonin: ‘Amerika është me ne’. Këtej molotovët, këtej flamujt e Gjermanisë dhe mbushën dynjanë që Gjermania na ka ndëshkuar.
Nesër në Bruksel janë të gjithë, është edhe Gjermania. Pas disa ditësh, do t’ju çoj si përshëndetje një informacion të detajuar nga takimi që do kem me kancelarin e Gjermanisë.
Dua të argëtohem pak me ata. Unë kam shumë qejf kur ata shkojnë vetë te grepi dhe tunden në grep.
Dua të them vetëm që sot ne përfaqësojmë Shqipërinë me forcën e transformimit. Jo thjesht sepse kemi restauruar fasada, as se kemi mundësinë të paraqitemi me atlete, por sepse ky është një vend që para një dekade kishte më pak se 10 miliardë euro prodhim. Sot ka kaluar 27 miliardë. Paga mesatare në sektorin publik është 1086 euro, të ardhurat janë rritur përsëri pa rritur taksën. Sot kreditë bankare janë 10 miliardë euro. Do të vazhdojë rruga e transformimit”, u shpreh Rama.
