Kapiteneria e Portit të Durrësit mori një thirrje për ndihmë nga kroçera “Marbella Explorer II” në orën 23:50, rreth 20 milje larg Durrësit, për një shtetas anglez të sëmurë në bord me simptoma të rënda që kërkonin ndërhyrje urgjente.
Kroçera po lundronte nga Korfuzi drejt Kotorit dhe menjëherë u udhëzua nga Kapiteneria e Portit të Durrësit që të afrohej në radë për të bërë të mundur marrjen e të sëmurit.
Paralelisht u njoftuan autoritetet përkatëse, si dhe rimorkiatori i ASHD-së, për realizimin e operacionit të transportit dhe shoqërimin e tij me ambulancë drejt spitalit rajonal të Durrësit.
Në orën 02:30, shtetasi anglez me inicialet C.P. mbërriti në spital nën kujdesin e mjekëve dhe ndodhet jashtë rrezikut për jetën.
Në operacion u angazhuan rimorkiatori “Joni” i ASHD-së me ekuipazhin përkatës, FSPD, Policia Kufitare, si dhe oficerët dhe Kapiteni i Portit të Durrësit.
