Disa dhjetëra mijëra persona morën pjesë në dy marshime rivale në Londër, njëra me moton “Bashkoni Mbretërinë”, e ekstremistit të djathtë Tommy Robinson dhe tjetra një demonstratë pro-palestineze.
Gjithashtu, mbi 4 mijë oficerë policie zbritën në rrugët e kryeqytetit britanik për të garantuar të ashtuquajturën “zona sterile” mes dy grupimeve.
Oficerët përdorën autoblinda, dronë, kuaj dhe qen policie teksa mundoheshin të ruanin sigurinë, në kuadër të atij që u konsiderua operacioni më i madh policor ndër vite, në një kohë kur mijëra tifozë do të ndiqnin ndeshjen finale të FA Cup.
Manifestuesit që morën pjesë në marshimin “Bashkoni Mbretërinë” u grumbulluan në Kingsway, përpara se të drejtoheshin për në Whitehall dhe të mblidheshin në Sheshin e Parlamentit.
Shumë prej tyre ngrinin flamurin e bashkimit, me disa që mbanin edhe kapele të kuqe me shkrimin “Make England Great Again” dhe bëritisnin “Starmer, largohu”.
Disa nga protestuesit deklaruan për BBC se ishin të zemëruar për një sërë çështjesh, përfshirë punën e qeverisë aktuale, ndërsa të tjerë për diskriminimin që i bëhet punëtorëve të bardhë, sidomos atyre që i përkasin klasës punëtore.
Kreu i tubimit masiv, Tommy Robinson i bëri thirrje turmës që të përfshihej në politikë, si duke u regjistruar për të votuar, ashtu edhe duke u bashkuar me partitë politike.
“A jeni gati për betejën e Britanisë? Në 2029-n kemi zgjedhje. Ne nuk i kërkojmë askujt të dalë e të luftojë, por ky është momenti më i rëndësisshëm i gjeneratës sonë”, deklaroi Robinson.
Ndërsa marshimi pro-Palestinës, që përkoi me atë që njihet si Dita e Nakbës, filloi në Kensington përpara se të drejtohej në Sheshin Waterloo.
Dita e Nakbës i referohet zhvendosjes së palestinezëve që u dëbuan nga shtëpitë e tyre gjatë luftës që çoi në krijimin e Izraelit, në vitet 1948-1949.
Demonstruesit shprehën një gamë të gjerë pikëpamjesh, me shumë prej tyre që prezantoheshin si aktivistë anti-gjenocid dhe anti-fashist.
Ata thanë se ishin të vetëdijshëm se disa banorë hebrenj të Londrës ishin ndjerë të frikësuar nga marshimi, por thanë se nuk e pranonin antisemitizmin dhe se në protestë nuk kishte vend për të.
