Ronald Araújo mund të largohet nga Barcelona gjatë merkatos së verës. Mbrojtësi uruguaian po shqyrton seriozisht mundësinë për të nisur një aventurë të re, pasi nuk është plotësisht i kënaqur me minutazhin dhe rolin e tij në projektin aktual të katalanasve.
Sipas AS, Araújo ka nisur të mendojë për largimin dhe është i hapur ndaj ofertave nga klube të mëdha europiane. Destinacioni që e tërheq më shumë është Premier League, ku më parë Liverpool dhe Aston Villa kishin shfaqur interes për të.
Në muajt e fundit, lëvizjet konkrete të këtyre klubeve për mbrojtësin janë ftohur, por dëshira e lojtarit për të luajtur në Angli mund të rihapë negociatat gjatë verës.
Këtë sezon, Araújo ka zhvilluar 36 ndeshje me Barcelona dhe ka shënuar 4 gola. Pavarësisht rëndësisë së tij në skuadër, pasiguria për rolin e tij mund ta shtyjë drejt një largimi nga Camp Nou.
