Situata te Real Madrid vazhdon të jetë e tensionuar, ndërsa këtë herë në qendër të vëmendjes është përplasja publike mes Kylian Mbappé dhe trajnerit Alvaro Arbeloa.
Pas fitores 2-0 ndaj Oviedo, ku Mbappé e nisi ndeshjen nga stoli, sulmuesi francez foli hapur për situatën e tij dhe nuk i kurseu mesazhet për trajnerin. Ai deklaroi se Arbeloa i kishte thënë se ishte “sulmuesi i katërt” në hierarkinë e skuadrës.
“Duhet të pranoj idenë e trajnerit. Më duhet të punoj që të jem më i mirë se Vini, Mastantuono dhe Gonzalo”, u shpreh Mbappé, duke lënë të kuptohet qartë pakënaqësinë e tij.
Arbeloa u përgjigj më pas në konferencë për shtyp, duke mohuar se i kishte thënë diçka të tillë sulmuesit francez. “Nuk ia kam thënë këtë. Do të doja të kisha katër sulmues, ndoshta nuk më ka kuptuar mirë”, deklaroi trajneri i Real Madrid.
Por tensioni nuk u ndal aty. Mbappé kritikoi edhe mënyrën si skuadra ka ndryshuar gjatë sezonit, duke theksuar se Real Madrid e nisi mirë në La Liga dhe Champions League, por humbi qartësinë në pjesën e dytë të sezonit.
“Kishim një stil të qartë loje dhe e lamë të na rrëshqiste nga duart”, tha francezi.
Pika më e nxehtë e përplasjes lidhet me El Clasico. Sipas raportimeve, Mbappé nuk e priti mirë faktin që nuk do të ishte titullar ndaj Barcelona. Më pas, ai u largua nga stërvitja në minutat e fundit për shkak shqetësimesh fizike dhe nuk u përfshi fare në listën e ndeshjes.
Arbeloa, nga ana tjetër, ka dhënë sinjale të qarta se nuk do të lejojë askënd të vendosë mbi autoritetin e tij. “Sa kohë jam unë në këtë karrige, vendos unë. Nëse nuk u pëlqen, mund të presin ndeshjen tjetër”, u shpreh trajneri.
Tensionet mes palëve vijnë në një moment shumë të vështirë për Real Madrid, që po mbyll një sezon të trazuar, me rezultate zhgënjyese dhe shumë polemika brenda dhomës së zhveshjes.
Mbappé u përball edhe me fishkëllima nga tifozët në Bernabéu kur hyri në fushë ndaj Oviedo, por francezi reagoi me një buzëqeshje të lehtë. Megjithatë, deklaratat e tij pas ndeshjes treguan se situata në Valdebebas është larg qetësisë.
