U shfaq papritur mbrëmjen e së enjtes në “prime time” një nga emrat më të lakuar të muajve të fundit, ish-drejtoresha e AKSHI-t, Mirlinda Karçanaj. Për të SPAK ka ngritur akuza të rënda që kanë të bëjnë me manipulimin e tenderëve me miliona euro dhe përfshirje në “grup të strukturuar kriminal”.
Ajo që pritej ishte një përballje me akuzat e rënda, lidhjet e saj me Ergys Agasin, një tjetër emër të bujshëm, por që mbetet në arrati, dhënie llogarie se si ndaheshin paratë publike duke manipuluar tenderat, rrëmbimet e biznesmenëve që prishnin punë, dy apartamentet dhe një vilë në Qerret, takimet me Agasin, arkat e verës të mbushura me euro… por asgjë.
Në fakt intervista rezultoi një lavazh i figurës së Karçanajt që u përlot disa herë dhe që “i qahej halli” se mediat i kishin rënë në qafë duke i përmendur emrin në një gjyq publik.
Karçanaj përsëriste fraza të gatshme se “e kishin futur në thertoren e gjësë së gjallë” se “AKSHI kishte bërë revolucion” dhe “AKSHI kishte bërë krenarë shqiptarët”, se ajo jetonte në një shtëpi me qera që e kishte marrë qëllimisht pranë punës që të mos humbte kohë në rast emergjente, se nuk kishte makinë dhe se vila e Qerretit nuk ishte e saj, por e marrë vetëm gjatë verës “si të gjithë shqiptarët që shkojnë me pushime”.
Aq shumë u përsëritën këto fraza sa në një moment u duk se kishte një defekt teknik në regjinë e TCH sepse frazat po përsëriteshin edhe një herë nga e para.
Karçanaj, akuzohet zyrtarisht nga Prokuroria e Posaçme (SPAK) për “Shkelje e barazisë së pjesëmarrësve në tendera apo ankande publike” (e kryer në formën e veçantë të bashkëpunimit, atë të grupit të strukturuar kriminal), “Grup i strukturuar kriminal”, “Kryerje e veprave penale nga organizata kriminale dhe grupi i strukturuar kriminal” dhe “Pastrim parash”.
Nga hetimet e SPAK, ajo është e dyshuar në manipulimin dhe favorizimin e paligjshëm në rreth 12 tendera publikë të zhvilluar nga AKSHI. Ajo dyshohet se ka vepruar si pjesë e një grupi të strukturuar kriminal të orientuar nga biznesmenët Ergys Agasi dhe Ermal Beqiri.
*Ky shkrim ripublikohet i marrë nga Lapsi.al
