SPAK ka marrë të pandehur Izmir Sakicën, Samuel Troshanin dhe Franko Lekën, anëtarë të grupit “Bajri”, të akuzuar për organizimin dhe planifikimin e atentatit ndaj Aleksandër Prendit dhe familjarëve të tij. Avokati Sokol Tahiraj, që përfaqëson të dyshuarit, thekson se ka kërkuar që të kryhen veprime hetimore shtesë në lidhje me këtë çështje.
Ngjarja ka ndodhur në gusht të vitit 2024 në Bushat.
Sipas hetimeve të Prokurorisë së Posaçme, tre të dyshuarit, janë nisur me mjete të blinduara drejt fshatit Rranxë, në njësinë administrative Bushat, me qëllim ekzekutimin e Prendit dhe familjes së tij.
Plani nuk është realizuar pasi sapo grupi ka hyrë në fshat, është përballur me të shtëna armësh nga vetë Aleksandër Prendi, çka ka sjellë një shkëmbim zjarri mes palëve. Nga ngjarja nuk pati të plagosur, por vetëm dëmtime të automjeteve.
SPAK ka ngritur ndaj Sakicës, Troshanit dhe Lekës akuzat për “vrasje në rrethana cilësuese”, mbetur në tentativë, “sigurim kushtesh për të kryer vrasje” dhe “armëmbajtje pa leje”, të gjitha të kryera në kuadër të grupit kriminal.
Ndërkohë, edhe Aleksandër Prendi është vënë nën akuzë për “vrasje në tentativë”, pasi sipas prokurorisë dyshohet se ai ka qëlluar ndaj grupit të armatosur gjatë përplasjes.
Hetimet kanë zbuluar se një prej mjeteve të përdorura nga grupi ishte i paregjistruar, me pronësi të panjohur dhe me targa të huaja që nuk i përkisnin automjetit.
Aktualisht në burg ndodhen Izmir Sakica dhe Samuel Troshani, të cilët u vetëdorëzuan në polici pas shpalljes në kërkim, ndërsa Franko Leka dhe Aleksandër Prendi vijojnë të jenë ende në arrati.
