Mirlinda Karçanaj ka folur në Top Channel për jetën personale, pasuritë dhe sekuestrimet ndaj saj, duke deklaruar se gjithçka që ka ndërtuar është rezultat i punës së saj ndër vite dhe se çdo pasuri është e deklaruar sipas ligjit.
Ish-drejtoresha e AKSHI-t tha se aktualisht jeton në një apartament me qira, të cilin e ka zgjedhur pranë vendit të punës pasi nuk drejton automjet.
“Jetoj në një shtëpi me qira. Deri në vitin 2024 kam jetuar në apartamentin ku kam lindur. Apartamentin ku jetoj me qira e kam marrë me kontratë dhe e kam zgjedhur afër punës, sepse nuk drejtoj makinë dhe nuk kam makinë”, deklaroi Karçanaj.
Ajo reagoi edhe për pasuritë e sekuestruara, duke theksuar se sekuestrimi nuk do të thotë automatikisht që një pasuri është e paligjshme.
“Një pasuri e sekuestruar nuk është e paligjshme. Por dua të shtoj se nuk mund të provoj ndjesi më të keqe se kriminalizimi i jetës sime”, u shpreh ajo.
Karçanaj kujtoi edhe periudhën e emigrimit në Kanada, duke thënë se pasuritë e saj janë ndërtuar me vite pune dhe sakrifice.
“Ato janë orenditë dhe muret e ndërtuara me dinjitet. Kam 30 vjet që punoj. Kam emigruar në Kanada, kam dalë nga shtëpia në 7 të mëngjesit dhe kthehesha në 8 të darkës”, deklaroi ish-drejtoresha e AKSHI-t.
Sipas saj, çdo pasuri që zotëron është e deklaruar pranë Inspektoratit të Lartë të Deklarimit dhe Kontrollit të Pasurive dhe Konfliktit të Interesit.
