Një nga skandalet më të mëdha të korrupsionit në Ukrainë po zgjerohet më tej, pasi publikimi i përgjimeve të reja nga mediat ukrainase ka ngritur dyshime për përfshirje indirekte të rrethit të afërt të presidentit Volodymyr Zelensky në një aferë miliona dollarëshe në sektorin e energjisë.
Sipas materialeve të bëra publike, përgjimet janë pjesë e hetimeve të Byrosë Kombëtare Kundër Korrupsionit në Ukrainë (NABU) ndaj biznesmenit Tymur Mindich, i cili përshkruhet si mik dhe bashkëpunëtor i ngushtë i Zelenskyt.
Hetimet lidhen me një skemë të dyshuar korrupsioni dhe ndikimi të paligjshëm në kompaninë shtetërore të energjisë “Energoatom”, e cila më herët ka çuar në shkarkimin e disa zyrtarëve të lartë, përfshirë ministra të qeverisë.
Publikimi i mbi 1400 faqeve me transkripte ka shtuar më tej dyshimet, ku përmendet disa herë një person i quajtur “Vova”, një formë e shkurtuar e emrit Volodymyr, që përdoret në mënyrë informale për presidentin Zelensky.
Sipas dosjes hetimore dhe raportimeve të mediave ukrainase, në skemë përmendet edhe ndërtimi i një kompleksi vilash luksoze pranë Kievit, ku dyshohet se disa prej tyre ishin të destinuara për figura të larta të administratës dhe persona të afërt me pushtetin.
Ndërkohë, autoritetet ukrainase të antikorrupsionit kanë ngritur akuza për pastrim parash ndaj ish-shefit të kabinetit presidencial Andriy Yermak, duke konfirmuar në mënyrë të tërthortë vazhdimin e hetimeve për çështjen.
Sipas hetuesve, për projektin e vilave janë përdorur fonde që dyshohet se vijnë nga skemat korruptive në sektorin energjetik, me një vlerë që kalon disa dhjetëra milionë dollarë.
Presidenti Zelensky deri tani nuk ka reaguar publikisht ndaj akuzave apo publikimit të përgjimeve, ndërsa zyra e tij është mjaftuar duke deklaruar se nuk ka koment për çështjen.
Pavarësisht zhvillimeve, sondazhet tregojnë se Zelensky vijon të ketë mbështetje të lartë në opinionin publik ukrainas, në një kohë kur vendi ndodhet ende në luftë me Rusinë.
