Drejtori i Përgjithshëm i Policisë së Shtetit, Drejtues Madhor Skender Hita, zhvilloi vizitën e tij të parë zyrtare në Kosovë, ku u prit nga Drejtori i Përgjithshëm i Policisë së Kosovës, Kolonel Gazmend Hoxha.
Gjatë takimit në Prishtinë, ku ishte i pranishëm edhe ambasadori i Shqipërisë në Kosovë, Petrit Malaj, si dhe drejtues të lartë të dy institucioneve, u vlerësua bashkëpunimi mes policive të dy vendeve dhe rezultatet e arritura në luftën kundër kriminalitetit.
“Ka vende që kur shkel, ndihen më shumë sesa mund të thuhen me fjalë. Prishtina është një prej tyre. Dhe unë sot, në vizitën time të parë zyrtare si Drejtor i Përgjithshëm i Policisë së Shtetit, nuk e ndjej këtë si një detyrim protokollar, por si privilegj, sepse jam mes vëllezërve”, u shpreh Hita.
Hita deklaroi se krimi i organizuar kërkon reagim të përbashkët dhe më të koordinuar nga institucionet ligjzbatuese.
“Krimi sot është më i organizuar, më i sofistikuar dhe pa kufij. Për këtë arsye, edhe përgjigjja jonë duhet të jetë më e shpejtë, më e koordinuar dhe më e fortë. Shqipëria dhe Kosova kanë ndërtuar një partneritet model mes dy policive tona dhe ky bashkëpunim do të vijojë të forcohet”, tha ai.
Nga ana e tij, drejtori i Policisë së Kosovës, Gazmend Hoxha, theksoi rëndësinë e koordinimit dhe bashkëpunimit operacional mes dy policive për garantimin e sigurisë dhe forcimin e sundimit të ligjit.
Në takim u diskutua edhe për sfidat aktuale të sigurisë, luftën kundër krimit ndërkufitar dhe rritjen e bashkëpunimit në shkëmbimin e informacionit, hetimet dhe operacionet e përbashkëta policore.
Takimi u mbyll me zotimin e palëve për thellimin e mëtejshëm të bashkëpunimit mes dy policive në fusha me interes të përbashkët.
