Zinedine Zidane ka folur për dallimet mes Cristiano Ronaldo dhe Kylian Mbappé, duke theksuar se talenti është vetëm fillimi për një lojtar që kërkon të arrijë majat e futbollit.
Ish-trajneri i Real Madrid pranoi se Mbappé është një futbollist i nivelit më të lartë, por sipas tij, Ronaldo kishte diçka të veçantë që e bënte të ndryshëm: mentalitetin dhe dëshirën për perfeksion.
“Kylian nuk ka nevojë që dikush t’i mësojë si të luajë futboll. Lojtarët me atë nivel talenti e kuptojnë vetë lojën.
Por në nivelin më të lartë, talenti është vetëm fillimi. Kur punoja me Cristiano te Real Madrid, një gjë më bënte gjithmonë përshtypje. Pas një ndeshjeje ku kishte shënuar, kishte dhënë asist dhe ishte shpallur lojtari i ndeshjes, të nesërmen vinte në zyrën time dhe kërkonte regjistrimin e plotë të ndeshjes.
Mendova se donte të shihte golat, por nuk ishte kështu. Ai donte të shihte vrapimet e gabuara, momentet kur kishte humbur topin dhe rastet që mund t’i kishte finalizuar më mirë. Ky është mentaliteti elitar.
Kylian i ka të gjitha cilësitë për të arritur atë nivel. Tani sfida është që perfeksioni të bëhet zakon, jo vetëm një moment”, tha Zidane.
Cristiano Ronaldo ka punuar me Zidane te Real Madrid nga viti 2016 deri në vitin 2018, periudhë në të cilën madrilenët arritën suksese të mëdha në Europë.
