Álvaro Arbeloa foli për mediat pas humbjes 2-0 të Real Madrid ndaj Barcelona në Camp Nou, një rezultat që i dha zyrtarisht titullin kampion skuadrës katalanase.
Trajneri madrilen pranoi se ishte një natë shumë e vështirë për ekipin e tij, ndërsa theksoi se e kupton plotësisht zemërimin e tifozëve pas një sezoni të komplikuar dhe plot polemika.
“Nuk mund të themi shumë. E kuptojmë frustrimin dhe zhgënjimin për këtë sezon. E dimë çfarë kemi bërë gabim. Jemi ngritur shumë herë më parë. E kuptojmë zemërimin, edhe ne jemi të zemëruar”, u shpreh Arbeloa.
I pyetur për episodin ku Bellingham u godit me bërryl nga Eric Garcia në zonë, Arbeloa tha se pamjet ishin të qarta dhe kërkoi shpjegime për mungesën e ndërhyrjes nga VAR.
“Nga ajo që pamë, ishte e qartë. Duhet të pyesim pse VAR nuk ndërhyri. Urime Barcelona për titullin, ata e morën shpejt kontrollin e ndeshjes”, deklaroi trajneri.
Arbeloa nuk deshi të fokusohej shumë te mungesa e Mbappé, i cili nuk ishte pjesë e skuadrës për shkak të shqetësimeve fizike. Ai tha se do të shihet në ditët në vijim si do të zhvillohet gjendja e francezit.
“Do të kisha dashur të ishte mirë dhe të luante”, tha shkurtimisht trajneri i Real Madrid.
Pavarësisht humbjes dhe titullit të fituar nga rivali i madh, Arbeloa kërkoi që skuadra të mos dorëzohet në ndeshjet e mbetura të sezonit.
“Nuk mund t’i humbasim këto tre ndeshje. Nuk po mbrojmë vetëm veten apo prestigjin tonë, po mbrojmë këtë stemë”, shtoi ai.
Trajneri pranoi se ndeshja u vështirësua shumë shpejt për Real Madrid, pasi Barcelona kaloi në avantazh herët dhe arriti ta menaxhonte sfidën me qetësi.
“U bë e vështirë shumë shpejt. Ata janë shumë të mirë kur kalojnë në avantazh. Janë një skuadër e organizuar mirë. U kërkova lojtarëve të jepnin gjithçka deri në fund, pavarësisht rezultatit”, tha Arbeloa.
Në lidhje me të ardhmen, ai nuk deshi të fliste për rindërtim, por theksoi se Real Madrid ka një grup lojtarësh me shumë cilësi dhe duhet të mësojë nga gabimet e këtij sezoni.
“Kemi një skuadër të madhe, me lojtarë që çdo ekip në Europë do t’i dëshironte. Tani duhet të mendojmë për të ardhmen dhe të bëjmë një hap përpara si grup”, përfundoi Arbeloa.
