Kylian Mbappé është rikthyer në listën e Real Madrid pas 16 ditësh mungesë, por atmosfera rreth tij nuk është aspak e qetë. Francezi është grumbulluar për El Clásico ndaj Barcelona, edhe pse ende nuk është e sigurt nëse do ta nisë ndeshjen nga minuta e parë.
Sulmuesi u dëmtua në ndeshjen ndaj Real Betis në “La Cartuja”, ku ndjeu shqetësime muskulore në këmbën e majtë. Edhe pse arriti të luante 81 minuta, më pas u detyrua të ndalej për shkak të dhimbjes. Që prej asaj dite, situata e tij ka qenë e ndërlikuar, jo vetëm nga ana fizike, por edhe për shkak të polemikave jashtë fushe.
Gjatë periudhës së rikuperimit, Mbappé udhëtoi drejt Italisë me partneren e tij, një udhëtim që shkaktoi shumë reagime te tifozët. Fotot në jaht, në plazh dhe në restorante dolën në një moment kur Real Madrid kishte një ndeshje të rëndësishme ndaj Espanyol. Edhe pse klubi e kishte lejuar këtë pushim, shumë tifozë prisnin që ai të ishte pranë skuadrës në një moment kaq delikat të sezonit.
Polemikat u shtuan edhe më shumë kur Mbappé u kthye në Madrid vetëm pak minuta para fillimit të ndeshjes së Real Madrid. Më pas, ai vazhdoi punën në Valdebebas për rikuperimin, por imazhi që ndezi më shumë debatin ishte ai i së enjtes, kur u largua nga qendra stërvitore duke qeshur, pikërisht në një ditë shumë të tensionuar për klubin pas përplasjes mes Valverde dhe Tchouaméni.
Ky moment nuk u prit mirë, pasi u pa si një pamje e panevojshme në një periudhë kur Real Madrid po kalon një krizë të brendshme. Edhe nëse e qeshura e tij nuk lidhej me ngjarjen në dhomën e zhveshjes, ajo krijoi përshtypjen e një lojtari të shkëputur nga situata e vështirë e klubit.
Sa i përket gjendjes fizike, Mbappé është më mirë, por ende jo në maksimum. Ai ka zhvilluar një pjesë të stërvitjeve me grupin dhe vendimi për aktivizimin e tij do të merret në bazë të ndjesive të fundit. Mundësia më e madhe është që ta nisë nga stoli dhe të luajë disa minuta në pjesën e dytë, por nuk përjashtohet plotësisht as aktivizimi si titullar.
Përballë Barcelona, statistikat e tij janë shumë të forta. Mbappé ka shënuar 12 gola ndaj katalanasve, duke pasur një mesatare prej një goli çdo 67 minuta. Barcelona është një nga viktimat e tij të preferuara, pas Montpellier, Lyon dhe Monaco.
Megjithatë, ka edhe një detaj interesant: Mbappé nuk ka dhënë asnjë asist ndaj Barcelona, as me PSG dhe as me Real Madrid. Këtë herë, francezi rikthehet në një moment ku nuk i mjafton vetëm prania në fushë. Ai duhet të japë përgjigje me gola, para se presioni i tifozëve të rritet edhe më shumë.
El Clásico mund të jetë ndeshja që ndryshon atmosferën rreth tij. Por nëse Mbappé nuk reagon, rikthimi në “Bernabéu” mund të jetë shumë i vështirë.
