Presidenti ukrainas, Volodymyr Zelensky deklaroi sot se Rusia ka shpërfillur thirrjen e Kievit për ndërprerjen e luftimeve, duke raportuar mbi 1 800 shkelje të armëpushimit të shpallur në mënyrë të njëanshme.
“Deri më sot, mund të konfirmojmë se pala ruse ka prishur regjimin e armëpushimit”, shkroi Zelensky në platformën X.
Ai theksoi se Kievi do të vendosë për hapat e mëtejshëm sot në mbrëmje, bazuar në raportet ushtarake dhe të shërbimeve sekrete.
Ukraina shpalli armëpushimin në fuqi nga mesnata e së mërkurës (21:00 GMT të martën) dhe i bëri thirrje Rusisë t’i bashkohej atij.
Megjithatë, Moska njoftoi më herët se armëpushimi i saj do të hynte në fuqi të premten, në kuadër të festimeve të Ditës së Fitores më 9 maj, që përkujton humbjen e Gjermanisë naziste nga Bashkimi Sovjetik.
Ministri i Jashtëm ukrainas, Andrii Sybiha akuzoi më herët Moskën për shkelje të armëpushimit të Kievit.
“Sulmet ruse me përdorimin e 108 dronëve dhe tre raketave vazhduan gjatë gjithë natës, përfshirë bombardimet në mëngjes ndaj Kharkivit dhe Zaporizhias”, shkroi ai në X.
“Sërish, Moska shpërfilli një thirrje reale dhe të drejtë për t’i dhënë fund luftimeve, të mbështetura nga shtete dhe organizata ndërkombëtare”, shtoi Sybiha.
“Kjo tregon se Rusia refuzon paqen dhe thirrjet e saj për armëpushim më 9 maj nuk kanë lidhje me diplomacinë. Vladimir Putini kujdeset vetëm për paradat ushtarake, jo për jetët njerëzore”, shtoi ai.
