Barcelona po tregohet më e kujdesshme në lidhje me interesimin për Alessandro Bastoni. Klubi katalanas priste një sinjal nga mbrojtësi i Inter, por deri tani italiani nuk ka dhënë asnjë shenjë se dëshiron të largohet nga Milano.
Sipas mediave katalanase, te Barcelona kishte shpresë që Bastoni të tregonte hapur interes për një transferim në “Camp Nou”. Një lëvizje e tillë do ta ndihmonte klubin spanjoll të ulte çmimin e kërkuar nga Inter, që nis nga rreth 70 milionë euro.
Disa burime i kanë bërë katalanasit të besojnë se marrëveshja mund të mbyllej për rreth 50 milionë euro, por Inter nuk ka ndërmend të bëjë ulje të mëdha. Zikaltërit e konsiderojnë Bastoni një lojtar të rëndësishëm, ndërsa vetë mbrojtësi është i lidhur fort me klubin, jo vetëm nga ana financiare, por edhe emocionale.
Një tjetër pengesë për Barcelona është situata ekonomike. Klubi ka përmirësuar financat, por ende duhet të jetë shumë i kujdesshëm me rregullat e La Liga. Në merkatot e fundit, katalanasit kanë bërë pak blerje të mëdha dhe çdo lëvizje duhet të llogaritet me kujdes.
Për këtë arsye, prioriteti i Barcelona nuk është më një mbrojtës, por një sulmues. Me të ardhmen e Robert Lewandowski në dyshim dhe pagën e tij të lartë që pritet të largohet nga bilanci, klubi mund të përqendrohet te afrimi i një lojtari për repartin ofensiv.
Interesimi për Bastoni nuk është mbyllur përfundimisht, por për momentin situata është ftohur ndjeshëm. Barcelona e di se mbrojtësi është i shtrenjtë, i rëndësishëm për Inter dhe aspak i lehtë për t’u bindur.
