Gazetarja Xhensila Kodra ka folur në emisionin “Studio24” për aksidentin tragjik të ndodhur në Durrës, ku një shofer në gjendje të dehur përplasi për vdekje dy fëmijë të mitur.
Sipas saj, drejtuesi i automjetit nuk ishte një rast i panjohur për autoritetet, pasi më herët i ishte pezulluar leja e drejtimit dy herë për shkelje të ndryshme, kryesisht për tejkalim shpejtësie. Megjithatë, në ato raste nuk ishte konstatuar në gjendje të dehur.
Kodra theksoi se nëse një shkelje përsëritet, ligji parashikon masa më të rënda, përfshirë heqjen e patentës nga 8 deri në 13 muaj. Ajo shtoi se banorët e zonës kanë bërë denoncime të shumta për sjelljen e rrezikshme të drejtuesit të automjetit.
Sipas dëshmive të tyre, autori është parë shpesh duke drejtuar mjetin me shpejtësi të lartë, duke kryer manovra të rrezikshme dhe në disa raste edhe në gjendje të dehur. Megjithatë, nuk është e qartë nëse këto denoncime janë trajtuar në mënyrë efektive nga strukturat përkatëse.
Gazetarja ngriti gjithashtu shqetësimin për veprimet e policisë rrugore dhe strukturave vendore, duke theksuar se nëse ankesat e qytetarëve do të ishin marrë seriozisht në kohë, ngjarja tragjike mund të ishte parandaluar.
Policia ka bërë me dije se i dyshuari është arrestuar dhe po hetohet për tre vepra penale, përfshirë shkaktimin e aksidentit me pasojë vdekjen në gjendje të dehur.
