Australia është në rrugën e duhur për të eliminuar kancerin e qafës së mitrës si problem shëndetësor deri në vitin 2035, sipas ekspertëve. Strategjia e vendit mbështetet në dy shtylla kryesore: vaksinimin kundër virusit HPV dhe përmirësimin e programeve të kontrollit. Që nga viti 2007, Australia ka zbatuar një program kombëtar vaksinimi që fillimisht përfshinte vajzat, por më pas u zgjërua edhe për djemtë, me synimin për të reduktuar përhapjen e rrezikshëm të virusit që shkakton shumicën e rasteve të kancerit të qafës së mitrës.
Një aspekt tjetër i rëndësishëm i strategjisë është përmirësimi i diagnostikimit. Vendimi për të kaluar nga testi tradicional Pap në testin më të ndjeshëm për HPV, të cilin gra mund ta bëjnë çdo pesë vjet, ka kontribuar në rritjen e numrit të grave që kontrollojnë shëndetin e tyre. Të dhënat tregojnë përparim të dukshëm: normat e rasteve dhe vdekjeve nga ky kancer janë përgjysmuar që nga vitet 1980. Në vitin 2021, për herë të parë nuk u regjistrua asnjë rast në gratë nën moshën 25 vjeçare. Aktualisht, Australia ka rreth 6.3 raste të reja për 100,000 gra, me mbi 80% të vajzave nën 15 vjeç të vaksinuara dhe 85% të grave në grupmoshat më të rrezikuara duke kryer kontrolle.
Megjithatë, sfida të rëndësishme mbeten. Shkalla e vaksinimit ka pësuar një rënie të vogël, veçanërisht në komunitetet indigjene, të cilat përballen me pengesa në aksesin në shërbimet shëndetësore dhe kanë normat më të larta të sëmundjes dhe vdekshmërisë. Ekspertët paralajmërojnë se hezitimi ndaj vaksinave, kostot e rritura të shërbimeve, dhe mungesa e aksesit mund të ngadalësojnë përpjekjet për të arritur qëllimin për eliminim.
Sipas Organizatës Botërore të Shëndetësisë, përpjekja e Australisë për të eliminuar kancerin e qafës së mitrës përbën një moment historik në shëndetin publik, duke e bërë këtë përpjekje globale unike në luftën kundër kancerit.
