Tre ditë pas ekzekutimit të çiftit Mujeci në Lezhë, policia ka gjetur të braktisur edhe makinën e dytë të përdorur nga autorët.
Policia njofton se në fshatin Torovicë, në një rrugë dytësore, në tokë arë, pranë një kanali, u gjet një automjet tip “Audi A4”, i cili dyshohet se është i përfshirë në dinamikën e ngjarjes dhe se është përdorur nga bashkautorët, të cilët kanë pasur rolin e vëzhguesve të lëvizjeve të viktimave.
Gjatë këqyrjes së tij, brenda automjetit u gjetën dokumentacione që u përkisnin autorëve të shpallur në kërkim.
Me qëllim kryerjen e verifikimeve më të specializuara, automjeti u sekuestrua në cilësinë e provës materiale dhe do t’i nënshtrohet ekspertizave kriminalistike.
Ditën e djeshme, u gjet i fshehur në zonën e Torovicës mjeti tip “Golf” pa targa, i përdorur nga autorët e dyshuar.
Ndërkohë, në mënyrë intensive dhe të pandërprerë, vijon kontrolli i zonave për lokalizimin dhe kapjen e autorëve të shpallur në kërkim.
Në kërkim janë shpallur tre persona, Renato Mhillaj 23 vjeç, Adriano Mhillaj 22 vjeç dhe Florin Mhillaj 36 vjeç djali, nipi dhe një i afërm i viktimës Genc Mhillaj nga Torovica, i vrarë në vitin 2016.
Atentati:
Ngjarja ndodhi ditën e diel, rreth orës 14:50 në dalje të fshatit Balldren, Lezhë, në rrugën Balldren-Torrovicë.
Drejt makinës me të cilën lëvizte çifti i bashkëshortëve Gentjana Mujeci 32 vjeç dhe Kreshnik Mujeci 39 vjeç u qëllua me breshëri plumbash.
Si pasojë të dy humbën jetën në vendin e ngjarjes.
Një ditë më pas, policia njoftoi se ka identifikuar dhe shpallur në kërkim tre autorët e dyshuar të ngjarjes, Adriano Mhillaj 22 vjeç, Florin Mhillaj 36 vjeç dhe Renato Mhillaj 23 vjeç. Ky i fundit është djali i Genc Mhillaj nga Torovica, i vrarë në vitin 2016.
Hakmarrja dyshohet se është shkaku i atentatit.
Rreth një vit pas ngjarjes, ai dhe vëllai i tij, Lin Mujeci, u arrestuan si të dyshuar. Sipas hetimeve të kohës, ata i kishin zënë pritë viktimës dhe e kishin qëlluar për vdekje pas një konflikti për motive të dobëta.
Megjithatë, procesi gjyqësor mori një tjetër rrjedhë. Në vitin 2018, Gjykata e Shkallës së Parë në Shkodër i shpalli të pafajshëm të dy, ndërsa një vit më pas edhe Apeli la në fuqi këtë vendim. Çështja u rikthye për rigjykim nga Gjykata e Lartë në tetor të vitit 2024.
Kontrolle janë ushtruar ne disa banesa ne Torovice, Malecaj dhe Balldre ndërsa janë marre me pyetje disa persona por pa arritur dot ne identifikim konkret.
