Një proces gjyqësor që mund të ndikojë drejtpërdrejt në të ardhmen e Inteligjencës Artificiale ka nisur këtë të martë, me përballjen mes miliarderëve Elon Musk dhe Sam Altman për drejtimin dhe transformimin e OpenAI, kompania që qëndron pas ChatGPT.
Seanca me deklaratat hapëse në padinë civile të Musk kundër OpenAI dhe Altman po zhvillohet në gjykatën federale të Oakland, në Kalifornia, pasi një ditë më parë u përzgjodhën nëntë anëtarët e jurisë.
“Përplasja” Musk–Altman
Musk pretendon se Altman dhe presidenti i OpenAI, Greg Brockman, kanë tradhtuar misionin fillestar të kompanisë, duke e kthyer atë nga një organizatë jofitimprurëse në një strukturë që synon fitime të mëdha për investitorët.
Ai kërkon dëmshpërblim prej 150 miliardë dollarësh nga OpenAI dhe Microsoft, një nga investitorët kryesorë, me fondet që, sipas tij, duhet të kalojnë në krahun filantropik të kompanisë. Musk kërkon gjithashtu rikthimin e OpenAI në një organizatë jofitimprurëse dhe largimin e Altman dhe Brockman nga drejtimi.
Të dy, Musk dhe Altman, mbërritën në gjykatë herët në mëngjes për deklaratat hapëse. Mes dëshmitarëve të pritshëm janë edhe drejtuesi i Microsoft, Satya Nadella, ndërsa vetë Musk pritet të dëshmojë brenda javës.
Nga laborator kërkimor në gjigant teknologjik
OpenAI u themelua në vitin 2015 nga Musk dhe Altman me synimin për të zhvilluar inteligjencën artificiale në dobi të njerëzimit dhe për të konkurruar kompani si Google. Sot, ajo është shndërruar në një gjigant teknologjik me vlerë qindra miliarda dollarë.
Sipas raportimeve, gjyqi mund të zbulojë prapaskenat dhe përplasjet e brendshme që kanë formësuar kompaninë, ndërsa gjithashtu mund të ndikojë në planet e saj për një ofertë publike fillestare (IPO), që potencialisht mund ta vlerësojë kompaninë deri në 1 trilion dollarë.
Reagimi i OpenAI
Nga ana tjetër, OpenAI ka kundërshtuar pretendimet e Musk, duke argumentuar se ai po vepron i nxitur nga rivaliteti dhe po përpiqet të frenojë zhvillimin e kompanisë në favor të sipërmarrjes së tij, xAI, të themeluar në vitin 2023.
Ndërkohë, kompania përballet me konkurrencë në rritje nga rivalë si Anthropic, duke investuar miliarda dollarë në infrastrukturë dhe kapacitete llogaritëse.
Ky proces gjyqësor pritet të ketë pasoja të gjera, jo vetëm për fatin e OpenAI, por edhe për mënyrën se si do të zhvillohet dhe rregullohet inteligjenca artificiale në të ardhmen.
