Presidenti i Indonezisë, Prabowo Subianto, ka urdhëruar nisjen e një hetimi pas përplasjes së dy trenave që ndodhi mbrëmjen e djeshme pranë kryeqytetit Xhakarta, një ngjarje që ka lënë të paktën 14 viktima dhe 84 të plagosur, sipas bilancit më të fundit.
Operacionet e kërkim-shpëtimit vijuan deri në mëngjesin e sotëm pranë stacionit Bekasi Timur, rreth 25 kilometra në lindje të Xhakartës, ku ndodhi aksidenti.
Sipas autoriteteve, një tren udhëtarësh i ndalur është goditur nga një tren i linjës së gjatë. Të gjitha viktimat ndodheshin në trenin e goditur, ndërsa rreth 240 pasagjerët e trenit tjetër u evakuuan në mënyrë të sigurt.
Përplasja raportohet se ka ndodhur rreth orës 20:40 me orën lokale.
Presidenti Subianto ka vizituar sot pacientët e shtruar në spital, ndërsa autoritetet kanë nisur hetimet për të përcaktuar shkaqet e aksidentit dhe përgjegjësitë për ngjarjen tragjike.
