Luka Modric do t’i nënshtrohet një ndërhyrjeje kirurgjikale në mollëzën e majtë, pas përplasjes me Locatelli gjatë ndeshjes mes Milan dhe Juventus.
Barazimi 0-0 mes dy skuadrave kaloi pa incidente të mëdha, por la pasoja për Milan. Në minutën e 80-të, Modric u detyrua të largohej para kohe nga fusha pas një përplasjeje kokë më kokë me Locatelli, ku kroati doli më i dëmtuari.
I shoqëruar nga një prej fizioterapistëve dhe nga kreu i stafit mjekësor të Milan, Stefano Mazzoni, Modric ia la vendin Jasharit. Ai u largua nga fusha nën duartrokitjet e tifozëve, me akull në fytyrë dhe me një mavijosje të dukshme në mollëzën e majtë.
Në dhomat e zhveshjes, lojtari qetësoi të gjithë për gjendjen e tij dhe më pas u kthye në shtëpi, me rekomandimin për të vazhduar vendosjen e akullit në zonën e dëmtuar.
Mëngjesin e sotëm, Modric iu nënshtrua ekzaminimeve për të përcaktuar shkallën e dëmtimit. Kontrollet konfirmuan shqetësimet e stafit mjekësor: frakturë në mollëzën e majtë.
Lojtari do të operohet në orët në vijim, ndërsa më shumë detaje për kohën e rikuperimit pritet të bëhen të ditura më vonë.
