Ish-trajneri i Barcelonës, Xavi Hernandez, ka dhënë një intervistë të gjatë për Romario, ku ka analizuar eksperiencën e tij te katalanasit dhe situatën aktuale të klubit. Spanjolli theksoi se puna e tij ka vendosur bazat për suksesin e sotëm të ekipit.
“E lamë Barcelonën konkurruese dhe fituam dy trofe. Ndërtuam një bazë me lojtarë të rinj që sot janë shtylla e skuadrës. Flick po bën një punë të shkëlqyer, por po ndërton mbi atë që kemi krijuar ne”, u shpreh Xavi.
Ai foli edhe për largimin e tij, duke lënë të kuptohet se kishte probleme të brendshme në klub. “Mendoja se do të vazhdoja, siç ishte rënë dakord, por pati çështje personale me dikë në klub që e penguan këtë”, tha ai, pa përmendur emra.
Xavi u ndal edhe te merkato, duke zbuluar se kishte tentuar rikthimin e disa emrave të mëdhenj si Messi, Neymar dhe Pedro, por situata financiare e klubit e bëri të pamundur. “Me Messin gjithçka ishte gati, por presidenti aktual nuk e donte kthimin e tij”, shtoi ai.
Për talentet aktualë, Xavi vlerësoi shumë Lamine Yamal, duke e krahasuar me Messin: “Është një nga të zgjedhurit. Mund të bëhet më i miri në botë”. Ai përmendi gjithashtu Pedri, Vitinha, Mac Allister dhe De Jong si mesfushorët më të mirë të momentit.
Në fund, Xavi la të hapur derën për të ardhmen, duke deklaruar se është gati për një projekt të ri, qoftë në nivel klubesh apo kombëtaresh, madje edhe në Brazil.
