Rafael Leao është kthyer në një nga objektivat më të nxehtë të merkatos verore, me Manchester United dhe Liverpool që kanë nisur kontaktet me Milanin për të kuptuar kushtet e një transferimi të mundshëm. Sulmuesi portugez vlerësohet rreth 60 milionë paund dhe konsiderohet një mundësi e mirë nga klubet angleze.
Sipas raportimeve, të dy klubet e Premier League kanë bërë kërkesa fillestare për situatën e lojtarit, duke u interesuar për çmimin dhe pagën e tij. Megjithatë, për momentin nuk ka oferta zyrtare, por vetëm kontakte për të eksploruar mundësinë e një marrëveshjeje në verë.
Milani nuk e konsideron më të pashitshëm Leaon dhe është i hapur për negociata, sidomos për të balancuar financat e klubit. Nga ana tjetër, Manchester United dhe Liverpool synojnë të mbyllin një marrëveshje para Botërorit 2026, për të shmangur rritjen e çmimit në rast të një performance të mirë të portugezit.
Leao shihet si një përforcim i rëndësishëm për të dy klubet. United vlerëson aftësinë e tij për të luajtur në disa pozicione në sulm, ndërsa Liverpool e konsideron si një zëvendësues potencial për Mohamed Salah, i cili pritet të largohet në verën e vitit 2026.
Megjithatë, gjithçka mund të varet edhe nga kualifikimi në Champions League, pasi pjesëmarrja në kompeticionin më të rëndësishëm europian do të jetë një faktor kyç për të bindur lojtarin dhe për të përfunduar transferimin.
