Milani ka nisur të lëvizë për përforcimin e repartit ofensiv dhe një nga emrat që ka dalë në pah në orët e fundit është ai i Alexander Sørloth. Sulmuesi norvegjez i Atletico Madridit shihet si një profil me eksperiencë dhe cilësi, pikërisht ato që kuqezinjtë po kërkojnë për sezonin e ardhshëm.
Me kualifikimin në Champions League që është gjithnjë e më pranë, drejtuesit e Milanit kanë filluar të planifikojnë merkaton verore. Pavarësisht pozicionit të mirë në renditje, problemi kryesor i skuadrës këtë sezon ka qenë mungesa e golave. Edhe pse renditet e dyta në Serie A, Milani ka vetëm sulmin e katërt më të mirë në kampionat, një tregues i qartë se repartit ofensiv i duhet më shumë peshë dhe efikasitet.
Rafa Leao mbetet golashënuesi më i mirë i ekipit me 9 gola, i ndjekur nga Pulisic me 8, ndërsa kontributi i sulmuesve të tjerë ka qenë më i ulët se pritshmëritë. Pikërisht për këtë arsye, klubi po vlerëson afrimin e një sulmuesi që mund të garantojë gola dhe besueshmëri në një sezon ku Milani do të jetë i angazhuar në disa fronte.
Atletico Madridi do të pranonte të diskutonte shitjen e Sørloth vetëm për një ofertë pranë 40 milionë eurove, shifër që do t’i lejonte klubit spanjoll të rikuperonte investimin e bërë për të. Për Milanin, kjo shumë mund të mos jetë e paarritshme, sidomos nëse sigurohen të ardhurat nga Champions League dhe nëse realizohet ndonjë shitje e rëndësishme.
Në këtë drejtim, e ardhmja e Rafael Leaos mbetet një temë e hapur. Milani është i gatshëm të dëgjojë oferta për portugezin, i cili vazhdon të ketë vlerë të lartë në treg. Një largim i mundshëm i tij do t’i jepte klubit më shumë hapësirë financiare për të investuar te një sulmues i nivelit të lartë.
Ndërkohë, emri i Robert Lewandowski-t mbetet një pistë shumë më e vështirë. Pengesa kryesore është paga e lartë e polakut, që konsiderohet jashtë mundësive financiare të Milanit. Për këtë arsye, Sørloth duket sot një objektiv më realist për sulmin kuqezi.
