Një tjetër goditje për Chelsea. Sipas raportimeve të fundit, Estêvão do të mungojë për pjesën e mbetur të sezonit pas dëmtimit që pësoi në ndeshjen ndaj Manchester United. Sulmuesi brazilian u detyrua të largohej nga fusha pasi ndjeu shqetësime në kofshë, ndërsa ekzaminimet mjekësore kanë konfirmuar një dëmtim në hamstring.
Lojtari ka nisur tashmë fazën e rikuperimit dhe objektivi kryesor mbetet që të jetë gati për Botërorin me Brazilin. Burime pranë futbollistit bëjnë me dije se ai do të mungojë të paktën 20 deri në 30 ditë, ndërsa për momentin nuk parashikohet ndërhyrje kirurgjikale. Kjo do të thotë se Estêvão nuk do të veshë më fanellën e Chelsea-t këtë sezon, duke i dhënë përparësi rikthimit të plotë fizik në rast se grumbullohet nga kombëtarja braziliane.
Me Botërorin që afrohet, ekziston ende mundësia që ai të jetë gati në kohë për turneun, nëse respekton afatet e rikuperimit të vendosura nga stafi mjekësor. Megjithatë, për të shmangur çdo rrezik, ai mund të humbasë ndeshjet e para të fazës së grupeve, me synimin për të qenë në formën më të mirë në fazat vendimtare të kompeticionit.
Te Chelsea ky dëmtim shihet si një humbje e rëndë, pasi Estêvão konsiderohet një nga elementët kyç të projektit të klubit për të ardhmen. Në 36 paraqitje, ai ka shënuar 8 gola dhe ka dhënë 4 asistime, duke treguar potencial të madh dhe duke u kthyer në një nga lojtarët më premtues të skuadrës.
Edhe për Brazilin mungesa e tij është shqetësuese. Estêvão konsiderohet një nga lojtarët më të rëndësishëm të kombëtares dhe një nga figurat mbi të cilat ndërtohet e ardhmja e Seleçaos. Brenda futbollit brazilian ai shihet si pasardhësi natyral i Neymar, ndaj rikuperimi i tij para Botërorit mbetet një prioritet i madh.
