Emri i José Mourinhos është një nga më të përfolurit mes trajnerëve që i janë propozuar Real Madridit për sezonin e ardhshëm. Bashkë me të, në ambientet e Valdebebas kanë qarkulluar edhe emra si Pochettino, Nagelsmann, Allegri, Klopp dhe Deschamps, ndërsa e ardhmja e pankinës madrilene vazhdon të mbetet e hapur.
Trajneri portugez, që aktualisht drejton Benficën, nuk e ka fshehur kurrë admirimin për Real Madridin dhe marrëdhënien e mirë me Florentino Pérez. Edhe pse largimi i tij pas eksperiencës së mëparshme në Bernabéu nuk ishte nga më të qetët, një rikthim i mundshëm nuk është përjashtuar. Madje, sipas raportimeve, agjenti i tij Jorge Mendes ia ka propozuar klubit madrilen mundësinë e rikthimit të Mourinhos, duke informuar edhe për klauzolën e largimit të teknikut portugez.
Megjithatë, pavarësisht shumë emrave të hedhur në qarkullim, te Real Madridi prioritet mbetet mbyllja sa më e mirë e sezonit aktual. Vendimi përfundimtar për të ardhmen e Arbeloas pritet të merret në javët e mbetura të sezonit, edhe pse vazhdimësia e tij në stolin e ekipit të parë duket gjithnjë e më pak e mundshme.
Brenda klubit vlerësohet pozitivisht rrugëtimi në Champions League, por disa vendime dhe paraqitje kanë rrezikuar seriozisht garën për titullin kampion. Po ashtu, drejtuesit kanë ngritur shqetësime edhe për qëndrimin e skuadrës, aq sa në ditët e fundit janë zhvilluar edhe takime mes stafit dhe lojtarëve për të kuptuar më mirë situatën.
Ndërkohë, në këtë periudhë të vitit është normale që agjentë, ndërmjetës dhe përfaqësues të ndryshëm të punojnë intensivisht për të ofruar emra trajnerësh dhe lojtarësh te klubet më të mëdha. Dhe si gjithmonë, pankina e Real Madridit mbetet një nga më të lakmuarat në futbollin europian. Pavarësisht gjithë zërave që qarkullojnë, një gjë duket e sigurt për momentin: Arbeloa do të vazhdojë të qëndrojë në stol deri në fund të sezonit.
